Friday 25 November 2011

အန်ကောဝပ် ခရီးစဉ် - ၅

အပိုင်း - ၄ ရေးပြီး အပိုင်း - ၅ (နောက်ဆုံးပိုင်း) အတွက် ဓါတ်ပုံတွေကို Memory Stick ထဲကနေ မှားဖျက်လိုက်မိလို့ ပုံတွေ မရှိတော့တာနဲ့ တော်တော်နဲ့ ဆက်မရေးဖြစ်တာ.. တနေ့က နန်းညီကျေးဇူးနဲ့ Facebook က ဓါတ်ပုံတွေ အားလုံးကို download လုပ်ပြီးတော့မှ ပုံတွေ ပြန်ရလို့ ဒီပို့စ်လေးကို လက်စသတ်လိုက်ပါတယ်။

ဒီအပိုင်းမှာတော့ စီယမ်းရိ(ပ်)က လမ်းဘေးရှုခင်းတွေ၊ ကျောင်းဝင်းထဲက ရှုခင်းတွေကို စုပြီး တင်ထားပါတယ်။

ပထမရက်က ညနေပိုင်းသွားတုန်း မိုးရွာတော့ ကားမှန်မှာ မိုးရေစက်လေးတွေ ကပ်တွယ်နေတာကို သဘောကျလို့ ရိုက်ခဲ့တာ။


အန်ကောဝပ်ရှေ့က ကျုံးနဲ့ ကျုံးဘေးက အပင်တွေ စိမ်းစိမ်းစိုစို ပဏ္ဍာရနေတာကို မြင်ရတာ စိတ်ချမ်းသာစရာကောင်းလို့ အသက်ကြီးတဲ့အခါ ဒီလိုပတ်ဝန်းကျင်လေးမှာ အေးအေးချမ်းချမ်းနေရရင် ကောင်းမယ် တွေးမိသေးတယ်။

နောက်တစ်ရက်မှာ သုံးဘီးဆိုင်ကယ်နဲ့ သွားတော့ လမ်းမှာ ရေတွေကြီးနေတာကို ဖြတ်ခဲ့ရသေးတယ်။

ဒီလမ်းလေးကလည်း လမ်းဘေးဝဲယာမှာ ဖြောင့်တန်းနေတဲ့ သစ်ပင်တွေနဲ့မို့ သဘောကျမိပြန်ရော.. ရန်ကုန်က ခရေပင်လမ်းကိုတောင် သတိရမိသေးတယ်.. ခပ်ဆင်ဆင်တူသလားလို့.. အပင်အကြီး အသေးတော့ ကွာတယ်။

လမ်းဘေးမှာ မျောက်တွေတွေ့လို့ အတူသွားတဲ့တစ်ယောက်က ဆင်းပြီး ဓါတ်ပုံရိုက်သေးတယ်.. ကျမကတော့ ကြောက်လို့ အဝေးကပဲ လှမ်းရိုက်တော့တယ်။

လမ်းဘေးမြက်ခင်းမှာ နွားကျောင်းနေတာလေးကို တွေ့ရတာ ကျေးလက်အငွေ့အသက်ကို ရစေသလိုပဲ..။

သူတို့ဆီက အိမ်ကလေးတွေကလည်း မြန်မာပြည် နယ်ဘက်က အိမ်လေးတွေလိုပဲ.. ခြေတံရှည်လေးတွေနဲ့..။

ဒါကတော့ အန်ကောဝပ်ရှေ့က ကား၊ သုံးဘီး၊ ဆိုင်ကယ်နဲ့ စက်ဘီးတွေ ရပ်စရာနေရာပါ။

အမြစ်တွေ နွယ်ပတ်နေတဲ့ ကျောင်းဆောင်တွေရှိတဲ့ ကျောင်းဝင်းရဲ့ အဝင်လမ်း

သစ်မြစ်တွေက လူပုံ၊ သတ္တဝါပုံတွေနဲ့ တူသလိုလို..

ရေညှိပင် စိမ်းစိမ်းလေးတွေနဲ့ လှနေတဲ့ ကျောက်တုံးကြီးတွေ..

ရှေးဟောင်းကျောင်းဆောင်တွေနဲ့ လိုက်ဖက်ညီတဲ့ စိမ်းညို့ညို့ပတ်ဝန်းကျင်..

ကျောင်းဆောင်ကို ပတ်ပြီး ပေါက်နေတဲ့ သစ်မြစ်ကြီးက မြွေကြီးနဲ့ တူသလိုလို..

ကျောင်းဆောင် နံရံအပေါ်ကို တက်ပေါက်နေတဲ့ အပင်ကြီး..

ကျောင်းဝင်းသန့်ရှင်းရေး လုပ်သား အမျိုးသမီးလေးတွေ အစိမ်းရောင် တူညီဝတ်စုံလေးတွေနဲ့..

ကျောင်းဝင်း အနောက်ဘက် တစ်နေရာမှာ ပန်းချီကားချပ်ရောင်းနေတာ.. ပန်းချီကားချပ်ဝယ်ရင် အဲ့ဒီ အပင်မှာ တွဲလွဲဆွဲထားတဲ့ အုန်းလက်နဲ့လုပ်ထားတဲ့ ဘူးတောင်းလေးနဲ့ ထည့်ပေးတယ်.. အဲ့ဘူးတောင်းလေးတွေက ချစ်စရာလေး..။

အပင်အမြင့်ကြီးမှာ နွယ်တက်နေတာကို သဘောကျလို့..

အန်ကောဝပ်ကျောင်းဝန်းထဲက လမ်းဘေးရှုခင်းတွေ..










စီယမ်းရိ(ပ်)က ပြတိုက်.. ဝင်ကြည့်မယ်လုပ်ပြီးမှ လူတွေကလည်း အရမ်းကို ပြိုင်းနေပြီ၊ အဲ့ဒီညနေမှာပဲ ပြန်တော့မှာဆိုတော့ အခန်းပဲ ပြန်နားပါတော့မယ်ဆိုပြီး မကြည့်ဖြစ်တော့ဘူး။


ကြည့်ရှုလေ့လာစရာတွေ မကုန်နိုင်သေးတဲ့ စီယမ်းရိ(ပ်)ကို နောက်တစ်ခေါက် ထပ်ပြီးလာဦးမယ်ဆိုတဲ့အတွေးနဲ့ ဌာနေကို ပြန်ဖို့ ထွက်ခွာခဲ့ပါတော့တယ်။

Thursday 24 November 2011

အကြွေစေ့လေးများ

တစ်တိုက်ထဲနေ သူငယ်ချင်းတစ်ယောက်က စပြီး အကြွေစေ့စုရာကနေ သူ့ဆီက ဓါတ်ကူးပြီး ကိုယ်ပါ အကြွေစေ့စုဖြစ်သွားခဲ့တာ။ ရှားပါး ပိုက်ဆံ အရွက်တွေနဲ့ ရောက်လေရာ အရပ်က ပိုက်ဆံအရွက်တွေလည်း အမှတ်တရ စုပါသေးတယ်။ အရွက်တွေကိုတော့ သိပ်စိတ်မပါလို့ ပို့စ်ထဲ မထည့်ရေးတော့ဘူး။

ဒီမှာ အကြွေစေ့တွေရပြီဆို ခေါင်းနဲ့ ပန်းကို လှန်ကြည့်၊ ကိုယ့်စုဗူးလေးထဲမှာ မရှိသေးတာဆိုရင် အဲ့ဒီအစေ့ကို စုဗူးလေးထဲ ထည့်စု၊ တခြားနိုင်ငံတွေ သွားဖြစ်လို့ အကြွေစေ့ သုံးတဲ့ နိုင်ငံဆို အဲ့ဒီအကြွေစေ့လေးတွေကို အမှတ်တရအနေနဲ့ သိမ်းထားပြီး စုဗူးလေးထဲ ထည့်စု၊ တစ်ချို့ သူငယ်ချင်းတွေ ဒီလာလည်တဲ့အခါ သူတို့ဆီက အကြွေစေ့လေးတွေကို အမှတ်တရ ပေးခဲ့တော့လည်း စုဗူးလေးထဲ ထည့်စု၊ အဲ့လိုနဲ့ပဲ အခုဆို အကြွေစေ့လေးတွေ ၇၆စေ့ ရှိသွားပြီ။

အဲ့ဒီ အကြွေစေ့လေးတွေကို အမှတ်တရအနေနဲ့ သိမ်းထားချင်လို့ ဒီပို့စ်လေးကို ရေးလိုက်ပါတယ်။

မြန်မာ - ၁ ကျပ်၊ ၅၀ ကျပ်


ထိုင်း - ၁၀ ဘတ်စေ့


ထိုင်း - ၅ ဘတ်၊ ၂ ဘတ်၊ ၁ ဘတ်၊ ပြား ၅၀၊ ပြား ၂၅ စေ့


တရုတ် - ၁ ယွမ်၊ ၅ ပြား၊ ၁ ပြား


စင်ကာပူ - ၁ ဒေါ်လာ၊ ၅၀ ဆင့်၊ ၂၀ ဆင့်၊ ၁၀ ဆင့်၊ ၅ ဆင့် ( စင်ကာပူက သူငယ်ချင်း အကိုကြီးတစ်ယောက်လာလည်တုန်းက လက်ဆောင် ပေးခဲ့တာပါ။)


မလေးရှား - ၁၀ စံ၊ ၅ စံ ( စင်ကာပူက သူငယ်ချင်း အကိုကြီးတစ်ယောက်လာလည်တုန်းက လက်ဆောင် ပေးခဲ့တာပါပဲ။ ဘယ်လိုခေါ်ရမယ် မသိတာနဲ့ အကြွေစေ့မှာ ရေးထားတဲ့ SENကို စံလို့ပဲ မြန်မာမှုပြုလိုက်ပါတယ်။)


အာရပ် - ၁ အေအီးဒီ (ထင်တာပါ.. မသေချာပါဘူး။ သိတဲ့သူများ မှားနေရင် ကျေးဇူးပြုပြီး ပြင်ပေးကြပါ။)


ဥရောပ - ၂ ယူရို၊ ၁ ယူရို၊ ၅၀ ဆင့်၊ ၂၀ ဆင့်၊ ၁၀ ဆင့်၊ ၅ ဆင့်၊ ၂ ဆင့်၊ ၁ ဆင့်


အင်္ဂလန် - ၁ ပေါင် (သူငယ်ချင်း ညီမလေးတစ်ယောက် လာလည်တုန်းက လက်ဆောင် ပေးခဲ့တာပါ။ ပေါင်စေ့က တော်တော်ကို ထူလို့ စုဗူးကို ဖွင့်ပြီးမှ ထည့်လို့ ရတယ်။ အထူအပါး ကွာခြားမှုကို သိသာအောင် ထိုင်း ၁၀ ဘတ်စေ့၊ ၂ ယူရိုစေ့တို့နဲ့ အတူ ယှဉ်ပြထားတာပါ။)



အကြွေစေ့တွေကို ဓါတ်ပုံရိုက်တာမှာ အလင်းမပြန်အောင် ဘယ်လိုရိုက်ရမှန်း မသိတာနဲ့ အဆင်ပြေသလိုပဲ ရိုက်ထားလိုက်တာ ကြည့်ရတာ သိပ်တော့ ထင်ထင်ရှားရှား၊ ပြတ်ပြတ်သားသား မရှိဘူး ဖြစ်နေတယ်။ နောင် ပိုပြီး ကောင်းကောင်းရိုက်တတ်ခဲ့ရင် ပုံကောင်းလေးတွေနဲ့ လဲတင်ပါ့မယ်ရှင်..။

Saturday 19 November 2011

Orthodontic Treatment - Part I

သွားများကို ညီညာ ဖြောင့်တန်းအောင် ပြုပြင်ခြင်း (ခ) Orthodontic Treatment

ငယ်ငယ်တုန်းက သတိမထားမိပေမယ့် ကြီးလာတဲ့အခါ၊ အထူးသဖြင့် နိုင်ငံခြားကို ရောက်ပြီးတဲ့နောက်ပိုင်းမှာ ရုပ်ရှင်တွေထဲမှာရော၊ အပြင်လောကမှာပါ အဖြူတွေ၊ ထိုင်းတွေ သွားလေးတွေ ညီပြီး ဖြောင့်တန်းနေတာ တွေ့တော့ အရမ်း သဘောကျမိတယ်။

ဟိုးအရင်က လူကြီးတွေပြောနေတာကို ကြားဖူးနေတာက အရင်ဘဝတုန်းက စကားကို ညာပြောတဲ့သူတွေက သွားမညီတာဖြစ်တတ်တယ်၊ ဒီဘဝမှာ စကားကို ညာပြောတဲ့သူတွေက ခံတွင်း အနံ့ဆိုးတတ်တယ်၊ ညာမပြောခဲ့တဲသူတွေမှ သွားလေးတွေက ညီပြီး လှနေတာ ဆိုတော့ အော်.. ငါအရင်ဘဝတုန်းက တော်တော် ညာပြောခဲ့ပုံရတယ်လို့ ထင်ထားခဲ့တာ။ နောက်တော့မှ ဘယ်ဟုတ်မလဲ၊ သွားလေးတွေ ညီနေတဲ့လူတိုင်းက သဘာဝအတိုင်း ညီနေတာ မဟုတ်ဘူးဆိုတာကို သိတော့တယ်။

ဒီကလူတွေက များသောအားဖြင့် စီးပွားရေးအရလည်း တတ်နိုင်တယ်ဆိုရင် သူတို့သား၊သမီးတွေကို အသက် ၁၂-၁၄အတွင်း သွားတွေကို ဘရေ့စ်တွေ (Braces) တပ်ပြီး ပြင်တဲ့ Orthodontic treatment လုပ်ပေးကြတယ်။ ဆိုတော့ ကလေးတွေက အရွယ်ရောက်တဲ့အခါ သွားလှလှလေးတွေနဲ့ချည်း ဖြစ်နေတော့တာပေါ့။ အမေရိကတို့၊ ဥရောပတို့လို အနောက်နိုင်ငံက လူတွေလည်း အဲ့လိုပဲဆိုတာ အင်တာနက် စာမျက်နှာတွေထဲမှာ တွေ့တော့မှ ငယ်ငယ်က မဟုတ်တဲ့မှိုင်းတွေ အတော်မိခဲ့ပါလားဆိုတာ သိတော့တယ်။

အဲ့ဒါတွေကို သိပြီးနောက်မှာ ကိုယ်ဖြစ်ချင်တဲ့အရာကို ဖြစ်အောင်လုပ်နိုင်ခွင့် လူတိုင်းမှာရှိတယ်၊ ဒီတော့ ငါလည်း သွားညီညီလေးတွေ လိုချင်တာကို ဖြစ်အောင်လုပ်မယ်ဆိုပြီး အင်တာနက်ထဲမှာ လျှောက်ရှာ၊ Pros & Consတွေ ရှာဖတ်၊ လုပ်ဖူးတဲ့သူတွေကို မေးပြီး အကြံဥာဏ်တောင်း၊ အားလုံးစုံတဲ့အခါမှာတော့ ဒီက ဆေးရုံ တစ်ရုံမှာ လုပ်ဖော်ကိုင်ဖက်တစ်ယောက်က ညွှန်းတဲ့ ဆရာဝန်မနဲ့ပြပြီး လုပ်ဖြစ်သွားခဲ့ပါတယ်။

အင်တာနက်မှာ သူများတွေရဲ့ အတွေ့အကြုံတွေကို လိုက်ရှာဖတ်တော့ အမေရိကန်မလေးတစ်ယောက်က သူ့ရဲ့ လစဉ် အခြေအနေလေးတွေကို ပို့စ် တင်ပေးထားတာ တွေ့ရတော့ အဲ့ဒါလေးက ကျမကအတွက် ဆုံးဖြတ်ချက်ချဖို့ အတော်ကို အသုံးဝင်ခဲ့ပါတယ်။ သူ့လုပ်ရပ်လေးကို သဘောကျလို့လည်း ကိုယ့်အတွေ့အကြုံကို ကိုယ့်အတွက်ကိုယ်လည်း သိမ်းလို့ရ၊ သိချင်သူရှိလည်း ဖတ်လို့ရအောင် ပို့စ်အဖြစ် တင်လိုက်တာပါ။

သွားပြင်တာကို လုပ်မယ်လို့ ဆုံးဖြတ်ပြီးတဲ့အခါ အိမ်ကိုပြောတော့ အိမ်ကလူတွေက သိပ် သဘောမတူကြဘူး။ သူတို့အမြင်မှာ ဘာမှ ရုပ်ပျက်၊ ဆင်းပျက်ဖြစ်နေတာလည်း မဟုတ်ဘဲနဲ့ သွားအကောင်းတွေကို အနည်းဆုံး ၄ချောင်းလောက် နှုတ်ရမယ်၊ ၃နှစ်ခွဲ ဘရေ့စ်တွေ (Braces) ဝတ်ထားရမယ်၊ အစားအသောက်ပျက်မယ်၊ သွားတွေ၊ သွားဖုံးတွေ၊ ပါးစောင်တွေ နာမယ်၊ ပိုက်ဆံတွေလည်း ကုန်ဦးမယ် ဆိုပြီး။ ဒါပေမယ့် ကျမက ငယ်ကတည်းက လုပ်ချင်တာတွေကို လုပ်နေကြဆိုတော့ အရမ်းတော့ မတားကြဘူး။ တားလည်း ရမှာ မဟုတ်ဘူးလို့ သိနေတာလည်း ပါမှာပေါ့လေ။

ဒီပုံတွေက မပြင်ခင်မှာ သွားအနေအထားတွေပါ။





သွားပြင်ဖို့အတွက် ပထမဆုံး ဆေးရုံကို ဖုန်းနဲ့ ရက်ချိန်းယူ၊ ဆေးရုံကိုသွား၊ ဆရာဝန်မက ဘယ်လောက် အချိ်န်အတွင်း သွားပြင်တာကို လုပ်ချင်သလဲဆိုပြီး အကြမ်းဖျင်းကုန်ကျစရိတ် စာရွက်တစ်ရွက်ထုတ်ပေးပြီး မေးပါတယ်။ ၁နှစ်အတွင်း၊ ၂နှစ်အတွင်း၊ ၃နှစ်ခွဲအတွင်း စသဖြင့် အချိန်ပေါ်မူတည်ပြီး ဈေးတွေလည်း ကွာသွားပါတယ်။ အကြာဆုံးက အသက်သာဆုံးနဲ့ အဆင်အပြေဆုံး ဖြစ်မယ်လို့ ပြောပါတယ်။ သွားတွေကို အရိုးပေါ်ကနေ ရွှေ့တာဖြစ်လို့ အချိန်ပေးပြီး ဖြည်းဖြည်းချင်း ရွှေ့သွားဖို့ ပြောပါတယ်။ အဲ့ဒါနဲ့ ကျမလည်း ၃နှစ်ခွဲအတွင်းကိုပဲ ရွေးလိုက်ပါတယ်။

ပြီးတဲ့အခါ သွားတွေကို စစ်၊ ပါးစပ်ထဲကို ပန်းရောင်အနှစ်တွေထည့်ပြီး သွားပုံစံယူ၊ သွားတွေကို ဓါတ်မှန်ရိုက်ခိုင်း၊ သွားတွေမှာ ဘရေ့စ်လေးတွေကို ကြိုးမတပ်ပေးလိုက်သေးဘဲ သူ့ချည်းတပ်ပေးလိုက်ပြီး တခြားဆရာဝန်အငယ်တစ်ယောက်ဆီကို သွားသန့်ရှင်းလုပ်ဖို့၊ သွားပေါက်ဖာဖို့နဲ့ သွားနှုတ်ဖို့ လွှတ်လိုက်ပါတယ်။


ဒီပုံကို စမြင်မြင်ချင်း ကိုယ့်ဖာသာကိုယ်တောင် တော်တော်လန့်သွားတယ်။ အောင်မလေး.. ဆိုပြီး။


ကျမသွားတွေက တော်တော်ထပ်နေတယ်ဆိုပေမယ့် သူတို့က ဘယ်လောက်ဒုက္ခပေးမလဲဆိုတာကို အဲ့ဒီတော့မှပဲ သိပါတော့တယ်။ ကျမက Floss တိုက်လေ့မရှိတာလည်း ပါလို့ ဖြစ်မယ်၊ သွားတချောင်းနဲ့ တစ်ချောင်းကြားမှာ Decayတွေ ဖြစ်နေတာ စုစုပေါင်း ၁၁ချောင်း ဖာလိုက်ရတယ်။ မသိလို့ မလုပ်သာ မလုပ်ဖြစ်ခဲ့ရင် နောင်ကြာတဲ့အခါ သွားတွေ လုံးပါးပါးပြီး အကောင်းသိပ်ကျန်တော့မှာ မဟုတ်ဘူး။ ၁ခါဖာရင် ၃-၄ချောင်းစီနဲ့ ၃ကြိမ်လောက် သွားခဲ့ရတယ်။ တစ်ကြိမ်ထဲနဲ့ဆို ပါးစပ်ဟထားရတာ၊ သွားတွေကျင်တာ မခံနိုင်မှာစိုးလို့။

သွားတွေဖာပြီးတော့ ထပ်နေတဲ့သွားတွေကို နေရာရွှေ့ဖို့အတွက် နေရာရအောင် တစ်ချို့သွားတွေကို နှုတ်ရမှာမို့ ကျမရဲ့ ပင်တိုင်ဆရာဝန်မဆီ ပြန်ရောက်လာပြီး ဘယ်သွားတွေကို နှုတ်ရမယ်ဆိုတဲ့ သူ့ဆုံးဖြတ်ချက်ကို သွားယူရပါတယ်။ အဲ့ဒီမှာ သူက အရင်ရက်က ရိုက်ထားတဲ့ ဓါတ်မှန်ကိုပြပြီး ကျမသွားတစ်ချောင်းက အာခေါင်ထဲမှာ သွားနှစ်ချောင်းရဲ့ အမြစ်ကြားမှာ ရှိနေတယ်၊ အဲ့ဒီအတွက် ပုံမှန်အတိုင်းသွားလို့ မရတော့ဘူး၊ ဒီသွားကို ခွဲခန်းဝင်ပြီး ခွဲထုတ်ရလိမ့်မယ်လို့ ပြောပါတယ်။

သူက အဲ့လိုပြောတော့ ကျမလည်း နည်းနည်းစိတ်ညစ်သွားတယ်။ ပြင်မယ်လို့ ဆုံးဖြတ်လိုက်မိတာပဲ မှားသွားပြီလား၊ မပြင်တော့ဘဲ နေရင်ပဲ ကောင်းမလားလို့ ဇဝေဇဝါဖြစ်သွားတယ်။ ဒါပေမယ့် ဖြစ်ခါမှ ဖြစ်ရော လုပ်လိုက်ပါမယ်ဆိုပြီး ခွဲထုတ်လိုက်တယ်။ ခွဲခန်းထဲမှာ ၃နာရီခွဲလောက်ကြာမယ်၊ ပါးစပ်ဟထားရတာလည်း ညောင်းတာ သေတော့မယ်၊ ဆရာဝန်ကလည်း တော်တော်ကို လုံးပန်းရရှာတာ၊ ထုံဆေး ၅ချက်လောက် ထိုးထားလို့သာ တော်သေးတယ်။

အဲ့လိုနဲ့ပဲ အပေါ်သွား ၂ချောင်း၊ အောက်သွား ၁ချောင်းကို နှုတ်ပြီး ဘရေ့စ်တွေကို နန်းကြိုးတပ်ပေးလိုက်တယ်။ ဆရာဝန်မကတော့ ပြောလိုက်တယ်.. အစပိုင်းမှာ အစာမာတွေ စားနိုင်မှာ မဟုတ်ဘူး၊ ဆန်ပြုတ်၊ ခေါက်ဆွဲပြုတ်၊ ဒိန်ချဉ်၊ နို့ စတာတွေနဲ့ အသက်ဆက်ဖို့။ ဒါပေမယ့် လုပ်ချင်တာ လုပ်သူ ကျမက စိတ်လိုက်မာန်ပါ စားချင်တာကို အနာခံပြီး စားလိုက်တာ.. အောက်သွားက ဘရေ့စ်လေးတွေ တရက်မှာ ၁ခု၊ ၂ခု ပြုတ်ထွက်ရာက စုစုပေါင်း ၄ခု ပြုတ်ထွက်သွားတယ်။ ပြုတ်ထွက်သွားဆို သူတို့က အပေါ်သွားနဲ့ သွားခုနေတာကိုး။ အစားသောင်းကျန်းသူ အပြစ်သက်သက် လုံးဝ မဟုတ်ဘူးလို့ ကိုယ့်ကိုယ်ကို ကာကွယ်လိုက်တယ်။ အဲ့တုန်းကဆို အစာတောင် ရဲရဲမမြိုချရဲဘူး၊ ဘရေ့စ်လေးတွေကို မြိုချမိမှာစိုးလို့ filter ခံပြီး မြိုချရတယ်။

ဆေးရုံကို ဖုန်းလှမ်းဆက်ပြီး ငါ့ဘရေ့စ်လေးတွေတော့ ပြုတ်ထွက်ကုန်ပြီ.. ဘယ်လိုလုပ်ရမလဲဆိုတော့.. ပြုတ်ထွက်သွားတာလေးတွေကို သိမ်းထားလိုက်တဲ့.. ပျောက်သွားရင် ပိုက်ထပ်ပေးရမှာတဲ့.. နောက်တစ်ခေါက် ဆရာဝန် ရက်ချိန်းရှိတော့မှ ယူခဲ့ပြီး ပြန်တပ်လိုက်ပါဆိုတာနဲ့ ဒီအတိုင်း သိမ်းထားလိုက်တယ်။

သွားတွေကို ဘရေ့စ်တပ်ပြီးတဲ့နောက် ဘာစားစား၊ စားပြီးတာနဲ့ သွားတိုက်ရတယ်၊ floss တိုက်ရတယ်၊ mouth wash နဲ့ ဆေးရတယ်၊ အလုပ်ကို ရှုပ်နေတာပဲ။ မတိုက်ရင် နေလို့ကို မရဘူး၊ ကြိုးတွေကြားထဲ အစာတွေက ဝင်နေတတ်တာဆိုတော့၊ စိတ်ထဲမှာ ပါးစပ်ထဲကို အမှိုက်ပုံကြီးပဲ ရောက်နေသလိုလို၊ မသတီလိုက်တာဆိုတာ အရမ်းပဲ။ အရင်က တစွတ်စွတ်စားကျင့်ရှိပေမယ့် အလုပ်ရှုပ်တာနဲ့ပဲ တရက် သုံးခါပဲစားပြီး ရေသောက်နေလိုက်တော့တယ်။

သွားမှာ တပ်ထားတဲ့ကြိုးတွေကို တစ်လ၊ တစ်ခါလဲရတယ်။ ဆရာဝန်မက လိုအပ်သလို ပြန်ပြီး အတိုးလျှော့လုပ်ဖို့။ ပထမလတုန်းက ဘရေ့စ်လေးတွေကို ဘာအရောင် သရေကွင်းလေးတွေ တပ်ချင်လဲဆိုတော့ မသိသာအောင် အကြည်ရောင်တပ်မယ်ဆိုပြီး ရွေးလိုက်တာ.. အကြည်ရောင်က တဖြည်းဖြည်း အရောင်ပြောင်းပြီး ဝါကျင်ကျင်ဖြစ်သွားတယ်။ နောက်တလကျတော့ ဘယ်ရမလဲ၊ အရင်က လုပ်ဖူးတဲ့ သူငယ်ချင်းကို မေးလိုက်တယ်.. ဘာအရောင်တပ်ရင် ကောင်းမလဲဆိုတော့.. သူက.. ငါကတော့ ရောင်စုံတပ်တယ်.. မတပ်ဖူးတဲ့အရောင်ကို မရှိသလောက်ပဲ.. အဲ့အထဲကမှ ပန်းရောင်၊ ခရမ်းရောင်နဲ့ အနီရောင်ကို အကြိုက်ဆုံးတဲ့။ ကိုယ်လဲ ဆရာမပြောသလို လုပ်ကြည့်ဦးမှဆိုပြီး ဒီတစ်ခါ ပန်းရောင်တပ်လိုက်တယ်။ ကိုယ့်ဖာသာကိုယ်တော့ သဘောတွေကို ကျလို့.။


နောက်တစ်ခေါက် ရက်ချိန်းက ၂လကြာမှဆိုတော့ နောက်၂လနေမှ ဒုတိယပိုင်းလေးကို ဆက်ရေးပါမယ်..။ :)